Gay, lesbiana eta etorkinen sendiak arazotsuen multzoan sartu ditu Madrilek

Familia plana onartu du Espainiako Gobernuak. Abortuak saihesteko, ikasketak ez oztopatzeko bekak eskainiko dizkie haurdun gazteei. Pentsioak igo nahi dizkie amei

hauteskunde-kanpainan-onartu-du-espainiako-gobernuak-familia-plana

Hauteskunde kanpainan onartu du Espainiako Gobernuak familia plana. LUIS JAUREGIALTZO / ARGAZKI PRESS

Familia Babesteko Plan Integrala onartu zuen atzo Espainiako Gobernuaren Ministroen Kontseiluak. Berritzailea baino gehiago—225 neurrien hiru laurden martxan daude jada—, ideologikoa da egitasmoa, familia eredu tradizionala indartzea baitu helburu; Alfonso Alonso Osasun eta Gizarte Gaietako ministroak berak onartu du PPren boto-emaileekiko «konpromisoa» bete dutela. Hala, familia aniztasuna «arazoak» dituzten sendien multzoan txertatu du gobernuak. «Beharrizan bereziak dituzten familien» atalean sartu ditu gay, lesbiana eta transexualen sendiak, etorkinenak, preso dauden edo egon diren amak, eta gaixotasun larriak dauzkaten pertsonak zein adinekoak dituztenak.

Zirriborroa lantzen ari zirela jada zeresana sortu zuen puntu horrek: LGTB elkarteak kexu agertu ziren, ez zirelako planean ageri. Azkenean, laguntza behar dutenen multzoan sartu ditu gobernuak. «Espainian kopuruz gehiengoa den ereduaren beharrizan diferenteak edo gehigarriak dituzten kolektiboak» dira, ministroaren arabera; 58 neurri bideratu ditu haientzat.

Edonola ere, sendi horietatik kanpo jarri du gobernuak planaren fokua. Familiaren inguruan PPk agertu izan dituen kezkak bildu baititu egitasmoak: biztanleriaren zahartzea, jaiotza tasa baxua eta amatasunaren «babesa». Ildo horretan, «harrituta» mintzatu da Alonso, emakumeek «berandu» dituztelako beren lehen haurrak —31 urtean dago batez bestekoa Espainian—. Ume gehiago nahi ditu ministroak, eta horretarako, amatasuna «babesteko beharra» ikusten du.

Haurdunentzako laguntzak aurreikusten ditu planak, «egoera zaurgarrian» daudenentzat batik bat. Ildo horretan, arreta berezia eskainiko die adingabeei eta gazteei: beka sistema bat abiatu nahi du gobernuak, «amatasuna ez dadin oztopo izan ikasketekin jarraitzeko», Alonsok adierazi duenez —autonomia erkidegoek dute beken gaineko eskumena, halere—. Abortuak saihesteko politika hori indartuko du gobernuak orain, abortuaren erreformaren porrotaren ondoren: PPren erkidego gobernu batzuek onartu dituzte amatasuna babesteko legeak azken urteotan.

Era berean, amen pentsioak handitzeko asmoa ere agertu du Espainiako Gobernuak: bi seme-alaba izan dituzten andreen pentsioa %5 igoko litzakete, hiru izan dituztenena %10, eta lau ume edo gehiago izan dituztenena %15. Alonsok gogoratu du emakumeen pentsioak gizonenak baino %30 txikiagoak direla, neurri batean, seme-alabak zaintzeko lanaldia murrizten dutelako amek. «Berdintasunaren aldeko neurria da, emakumea ama gisara aitortzekoa, eta gizartearen iraunkortasunarekiko konpromisoa». Toledoko Itunaren barruan negoziatu beharko du neurria.

Oposizioaren kritikak eragin ditu familia planak. Batetik, hauteskunde kanpainan onartu dutelako; bestetik, berrikuntzarik ez dakarrelako, ezta dirurik ere: 5.526 milioi euroko aurrekontua jarri dio gobernuak, baina ez du zehaztu zein sailetik aterako den.

Hilaren 21ean sexu heziketari buruzko saio bat hasiko da ETB1en

Jon Gomez Garaik zuzendu eta aurkeztuko du ‘Sexsua’. Bi hilabetez, ostegun gauetan emango dute programa berria (23:30)

Jon Gomez Garai

Jon Gomez Garaik sortu du Sexsua saioaren ideia. EITB

Modu natural eta entretenigarri batean sexu heziketaz aritzeko saioa egingo du ETBk datorren astetik aurrera euskarazko katean. Ostegunetan, Ur handitan saioa amaitutakoan, Sexsua ikusi ahalko da, bi hilabetez. ETBren 32 urteko historian sexuari eskainitako saio bakarra eman dute: Lorena Berdunek ETB2n gidatutako Me lo dices o me lo cuentas, 2002-2003ko denboraldian.

Jon Gomez Garai kazetariak sortu du proiektuaren ideia. Hura izango da aurkezlea eta zuzendaria: «Aspaldian nenbilen gazteentzat saio dibertigarri eta aldi berean hezigarri bat egin behar zela pentsatuz. Sexu hezkuntza gai erakargarria da. Horretatik asko dugu ikasteko, gure sexu harremanak erabat matxistak direlako», esan du kazetariak. Desirak taldeko sexologoekin jarri zen harremanetan gaiak lantzeko, eta harrera «ezin hobea» jaso zuen. Zirriborro ekoizpen etxearen lan teknikoarekin ari da saioa egiten.

Aste bakoitzean sexu hezkuntzari lotutako gai bat jorratuko dute: estreinako saioan, zoru pelbikoaz ariko dira; bigarren saioan, fantasia eta orientazio sexualen arteko gorabeherak ekarriko ditu; hirugarrenean, industria pornografikoak gizartean duen eragina aztertuko dute; laugarren saioak antisorgailuak izango ditu hizpide; bosgarrenean, drogek harremanetan dituzten eraginak aztertuko dituzte, eta alkohola pizgarria ala depresorea den galdetuko dute; seigarren saioan sexu hezkuntza ikastetxeetan eta unibertsitatean nola lantzen den aztertuko dute. Horretarako, Bigarren Hezkuntzako gela bat eta Euskal Herriko Unibertsitateko Irakasle Eskolako beste bat bisitatuko ditu aurkezleak.

Saio bakoitzean, sexologo eta mediku batek argituko ditu zalantzak. Gainera, beste hainbat atal izango dira: pertsonaia ezagunekin elkarrizketak, herritarrak proban jarriko dituzten ariketak, kale inkestak eta bitxikeriak. «Atalak aurkezpenik gabe joango dira, erritmo arinarekin».

Eusko Jaurlaritzaren Hezkuntza eta Osasun sailen babesa du saioak, eta Gomezek egunotan Lakuan proposatuko du ikastetxeetan saioa gazteei ematea.

EITBren webgunean tarte berezitua izango du programak,Eitb.eus/sexsua helbidean, eduki osagarriekin; adibidez, aktore pornografiko gay baten eta emagin baten elkarrizketak, osorik.

Ikusle gazteez gain, helduak ere erakarri nahi ditu Gomezek.