Ehgam-ek Urrezko Hirukia eta Trapuzko Espartina banatuko ditu aurten ere, azken hamarkadetan egin duen bezala. Urtero, sexu askapenaren inguruan nabarmendu den pertsona, ekimen edo kolektibo bat saritzea du helburu Urrezko Hirukiak, eta, aldiz, sexu askapenaren bidean oztopo izan diren egitasmo edo pertsonei ematen zaie Trapuzko Espartina.

Faxismoaren gorakada betean banatuko ditugu Hirukia eta Espartina aurten, Israelek Palestinaren aurkako genozidioarekin jarraitzen duen bitartean, eta gerra hotsak gero eta ozenagoak diren honetan. Hain zuzen ere, badakigu transfobia dela pentsamendu faxistaren oinarrietako bat, eta horrekin lotuta daude gaur banatuko ditugun sariak.

Aurtengo Urrezko Hirukiarekin, Ehgamek Anitzak, Loratuz Lotu, Lumagorri eta Sumintrans kolektiboak egiten ari diren lana aitortu nahi du; hain zuzen ere, Osakidetzak eta, zehazki, Gurutzetako ospitaleko (GIU) Genero Identitatearen Unitateak pertsona transak artatzeko duen modua salatzeko egiten ari diren borroka aitortu nahi dugu.

Anitzak, Loratuz Lotu eta Lumagorri kolektiboek 2024ko abuztuan egin zuten prentsaurrekoa, ESK sindikatuarekin batera, GIUan pertsona transen identitatea patologizatzeari utz diezaiotela eskatzeko. Geroztik, hainbat pauso eman dituzte borroka honen barruan, eta hilabete honetan Osakidetzako Genero Identitatearen Unitatearen inguruko txostena aurkeztu dute, zeinetan salatzen den Gurutzetako unitateak ez dituela pertsona transak errespetuz eta duin artatzen.

Sumintrans, bestetik, 2024 bukaeran sortu zen GIUak ezartzen dituen biolentziak salatzeko, eta Bilbon eta Gasteizen egin ditu aurkezpenak orain arte, sare sozialetan Gurutzetako unitatearen hainbat jokabide salatzeko testuak konpartitzeaz gainera.

Kolektiboek salatzen dute GIUak psikiatriatik pasatzera behartzen dituela pertsona transak, barne protokoloen aitzakiapean, legez kanpokoa bada ere, eta tratu umiliagarria jasaten dutela.

Horrez gainera, salatzen dute pertsona transei kirurgiak ukatzen dizkietela lodiak izateagatik, estetika aitzakia hartuta, eta pertsona ez binarioei tratamenduak ukatu dizkietela, Trans Legean jasotako eskubideen onuradun ez direla argudiatuta.

Salatu dute gizon transak histerektomiak izateko presionatzen dituztela, osasunarekin lotutako arrazoirik gabe. Eta profesionalek hainbat aitzakia erabiltzen dituztela hormonazio eta ebakuntzetarako sarbidea ukatzeko. Gainera, Osakidetzak ez du inolako kolektibo trans kontuan izan pertsona transei arreta emateko osasun-gida berria osatzeko orduan.

Haiekin batera, guk ere pertsona transen despatologizazioa, GIUaren indarkeriarekin amaitzea eta kalitatezko osasun arreta deszentralizatua eskatzen dugu, lehen mailako arretari ere garrantzia emanez. Gora amorru transa!

2025eko Trapuzko Espartina, berriz, maiatzaren 10ean feminista transbaztertzaileek Bilbon egin zituzten jardunaldiei eman nahi diegu aurten. Egun hartan haur eta gazte transak jarri zituzten jo-puntuan Bizkaiko Abokatuen Elkargoan egin zituzten jardunaldietan eta Kasilda parkean egindako ekitaldi publikoan. Ideia erreakzionario eta faxistak gero eta zabalduago daude, eta askotan hurbilekoak izan beharko liratekeen espazio politikoetan ere zabaltzen dira. Badakigu Euskal Herriko mugimendu feministaren gehiengoa transinklusiboa dela, baina badaude han-hemen transbaztertzaileak diren talde batzuk eta ezinbestekoa da haiei aurre egitea.

 Mugimendu  feministak  eta, mugimendu sozialek oro har, posizionamendu argi bat hartu behar dute transfobiaren eta feminismo transbaztertzailearen aurrean.

Bukatzeko, hainbat kolektibo eta norbanako LGTBIAQ+, transfeminista, eta antiarrazistak emandako erantzuna txalotu nahi dugu, zeina aurreko larunbatean errepikatu baitzen, trans-baztertzaileek Bilbon egindako beste kontzentrazio baten aurrean.

 

 

Berria: Sexu askatasuna bultzatzen duten kolektiboak saritu ditu Ehgam elkarteak